Zero Waste
0

من كام شهر لاحظت إن عندي حشرات صغيرة حوالين الزبالة، وقتها كنت غالبا باكل فاكهة وخضار كتير. شوية وقعدت افكر في الناس اللي بتلم وتفرز الزبالة، بيفتحوا الكيس يلاقوا بواقي أكل على بلاستيك على إزاز على كل حاجة سوا. حسيت بالذنب. قلت لنفسي إن أضعف الإيمان هو إني أفصل الحاجات عن بعض علشان شغلهم يبقى أسهل أو أقل سخافة، ومن ساعتها بقيت اعمل كيس كل يوم ارمي فيه بواقي الأكل المختلفة واقفله كويس وارميه في كيس الزبالة الكبير، وارمي البلاستيك والورق على جنب واحطه في كيس لوحده مرة في الإسبوع، والإزاز يا أرجعه للمكان اللي باشتري منه المنتجات اللي جاية فيها، أو باوديها لمكان بيعمل منتجات فنية من الإزاز.

أضعف الإيمان اللي بدأ من كام شهر دلوقتي مخليني متطوعة بشوية وقت لجرينش (Greenish) في محاولة مني لفهم إيه الحلول البديلة لكل الاستهلاك المضر بالبيئة اللي بنعمله. في أول اجتماع للمتطوعات (وكان فيه متطوع واحد راجل) عرفت لأول مرة عن حاجة اسمها “صفر نفايات” (zero waste) وقابلت واحدة ملهمة من الاسماعيلية بقالها سنة مفيش حاجة بترميها “صفر نفايات”. بالنسبة لشخص زيي بيستهلك حاجات كتير وكتير من قراراته الشرائية نابعة في أوقات كتير عن “المزاج” مش “الاحتياج”، كان شئ كاشف ليا إن الإسلوب ده في الشراء مضر بالبيئة علشان كل حاجة باشتريها عقبال ما بتوصل لي بتستهلك كم كبير من المواد المضرة وبتيجي غالبا متغلفة في بلاستيك مش بيتحلل. أنا لظروف شخصية اضطريت اعيش على الحد الأدنى من الأشياء، مش عارفة لما الظروف دي خلصت رجعت تاني لسلوك استهلاكي مالوش علاقة بسد احتياج حقيقي. تقليل الاستهلاك مش بس بالنسبة لي دلوقتي قرار ممكن يقلل من الضرر على البيئة، بس كمان قرار إني أركز في نمط استهلاكي اللي أصبح من وجهة نظري غلط.

بدأت أركز أكتر وانزعج أكتر من كم البلاستيك اللي بارميه، كل الخضار والفاكهة اللي بيتلف في فوم أو بيتحط في بلاستيك. ركزت قد إيه اختياراتي مش بيحددها قد إيه هي خيارات مضرة بالبيئة واتضايقت من نفسي. بدل ما أعدي على الراجل بتاع الخضار والفاكهة كسلت وعديت جبت كل حاجة من السوبر ماركت اللي جنبي وبالتالي نتج عن ده فائض مالوش داعي من البلاستيك. يومها برده كسلت اطلع شقتي اجيب أكياس القماش اللي باشتري فيها حاجتي، بس افتكرت اقول للراجل إن يحط كل حاجة في كيس واحد مش أكتر. أنا لسه فهمي ومعلوماتي قليلة جدا في الموضوع ده بس من شوية الحاجات اللي عرفتها حسيت إن مفيش داعي استخدم مواد مش بتتحلل أو لما بتروح في أكتر مكان بحبه (البحر) بتموت السمك، وإن “البنزين” اللي بتستخدمه الطيارات مضر بالبيئة (مش عارفة اتحكم في ده قوي للأسف)، وإن تصنيع اللحمة بالشكل الحالي بيسبب خروج غازات مؤذية لطبقة الأوزون اللي بتحمينا من آشعة الشمس الضارة. شكل الموضوع كبير قوي وساعات باحس إن صعب يتغير بيا بس في نفس الوقت مش عايزة أكون سبب إن كائنات تتأذي ولا إن البيئة تتضر أكتر.

أنا لسه في بداية طريق مبسوطة إني بدأته، طريق إن وجودي على الكوكب يبقى أقل ضرراً مش أكتر. عارفة إن فيه حاجات كتيرة تانية لازم تتعمل علشان حقيقي أبقى أقل ضرراً للبيئة – زي مثلا إني أقلل من سفري أو استهلاكي للحمة يقل، وحاجات تانية كتير، بس كل حاجة في الحياة خطوات والفترة دي وعي بأهمية تأثيرنا على البيئة بيتشكل وباخد أول خطواتي دلوقتي.

Leave a Comment

Your email address will not be published.

0

TOP

X